16 مايو 2015

سعيد نصر يكتب: ربنا يقويك ويخليك لينا يا ريس !

ربنا يقويك ويخليك لينا ياريس .. ماهو إنت تعبان عشان تريحينا .. ومن كتر حبك لينا وخوفك علينا .. مش عايزنا حتى نفكر فى أى شىء .. ولا حتى عايزنا نبقى معاك ولا نبقى ضدك .. وده كله لأنك بتحبنا حب حقيقى ! 
ولأننا نور عينيك إنت مش فى حاجة لينا .. لأنك فى الأساس بتشوف بينا .. ولأن هناك رابط بين العقل ونور العين .. فأنت مش محتاجنا نفكر معاك .. لأن إنت عقلك يسع عقول الـ 90 مليون !!
أنت نفسك قلت كدة فى المؤتمر الإقتصادى .. فاكر ولا أفكرك .. مش انت قلت فى المؤتمر .. أنا عارف مشاكل مصر زى ما أنا شايفكم أدامى .. يبقى عندك حق لا تسمع لنا .. ولا تبقى محتاج لبرلمان .. ولا لاعلام حر .. كل ده مالوش لازمة .. البركة فيك هتبقى حلوة على إيديك !!! 
إحنا مصدقين إننا نور عينيك .. وعشان نفضل نور عينيك .. حظرت روابط الألتراس و أعدمت الاخوان .. وحفرت لنا قناة السويس الجديدة فى سنة واحدة ، فى زمن قياسى .. كل ده من غير وجود برلمان يساعدك .. عشان كدة عايزينك سنتين كمان من غير برلمان !!!!
دوس على كل معارضيك ميهمكش .. إنت وراك شعب بيأيدك .. كل معارضيك خونة وعملاء .. ومش عارفين مصلحة البلد .. ومش شايفين مخطط تقسيم مصر .. و مش مقدرين خطر الإرهاب .. ومش عارفين إن لولاك كنا رحنا فى ستين سوريا وليبيا .. ومش عارفين إن القضاء حكم على قادة الاخوان بالاعدام عشان البلد تستقر وتحلو !!!!!
خليك على نفس السياسات ميهمكش .. نكّل بكل اللى شارك فى ثورة يناير .. قصدى فى مؤامرة يناير ! .. وإعط توجيهاتك للجهات السيادية بوقف أى برنامج يقول كلمة حق .. هم ناسيين إنك الرئيس الضرورة .. الرئيس الحتمى .. إننا من غيرك ولا حاجة .. وناقصنا كم مليون حاجة .. ناقصنا إنك تربينا على الجبن والخضوع والذل .. بعد ما كنا نسينا الذل وكسرنا حاجز الخوف .. خليك على سياستك يا ريس .. إنت كدة بتعمل أهم إنجاز فى التاريخ .. بترجع المصريين لأصلهم .. بترجع الخوف للروح .. بتقص ريش الطير .. وده لأنك عايزنا نرتبط بيها ارتباط حقيقى !!!!!!
مع إنى متأكد إن مش هتحقق أى إنجاز .. لأنك بطبق خطط واستراتيجيات موضوعة من أيام مبارك .. وليس فيها بعد أجتماعى بالمرة .. إلا إنى عايزك تحكم لأخر العمر .. وربنا يديك طول العمر .. مش لأنى مصدق كذبة الرئيس الضرورة .. لكن عشان الناس اللى رقصت ترقص كمان وكمان .. واللى قالت مفتاح شقتى ترمى نفسها من البلكونة .. واللى قالت ملك يمينك تصرخ وتقول " أرجووووووووووووك ....." !!!!!!!

ليست هناك تعليقات: